बार्सिलोनाका फरवार्ड मेम्फिस डिपाएले दुई गोल गरेपछि विश्वकप छनोटअन्तर्गत युरोपियन छनोटमा नेदरल्यान्ड्सले मोन्टेनेग्रोमाथि सहज जित निकालेको छ।
कतार विश्वकप छनोटअन्तर्गत घरेलु मैदानमा नेदरल्यान्ड्सले मोन्टेनेग्रोमाथि ४/० गोल अन्तरले जित निकालेको हो। डच टिमका लागि जर्जिनो वाइनाल्डम र कोडी गाक्पोको नाममा पनि समान १/१ गोल रह्यो।
फिलिप्स स्टेडियम इन्डओभेनमा शनिबार राति भएको खेलको ३८औं मिनेटमा डिपाएको पेनाल्टीमार्फत नेदरल्यान्ड्सले अग्रता लियो। पहिलो हाफमा १/० को अग्रता बनाएको नेदरल्यान्ड्स दोस्रो हाफमा भने थप आक्रमक बन्यो। ६२औं मिनेटमा कोडी गाक्पोको पासमा डिपाएले व्यक्तिगत र टोलीका लागि दोस्रो गोल गर्दै डच टोलीको अग्रता दोब्बर पारे।
७०औं मिनेमा जर्जिनो वाइनाल्डमले स्टेभेन वर्गहुइसको पासमा गोल गर्दै नेदरल्यान्ड्सलाई फराकिलो जिततर्फ अग्रसर गराए। ७६औं मिनेटमा कोडी गाक्पोले टेरेल मालासियाको पासमा गोल गर्दै नेदरल्यान्ड्सलाई ४/० को फराकिलो जित दिलाए।
जितपछि समूह ुजीुमा नेदरल्यान्ड्स ५ खेलबाट १० अंक जोडेर दोस्रो स्थानमा रहेको छ। ११ अंकका साथमा टर्की शीर्षस्थानमा छ। पराजित मोन्टेनग्रो ७ अंक जोडेर चौथो स्थानमा रहेको छ।
प्रतिक्रिया