काठमाडौं । लागुऔषध सहित प्रहरीले ६ जनालाई पक्राउ गरेको छ। प्रहरीले देशमा विभिन्न क्षेत्रबाट उनीहरूलाई पक्राउ गरेको हो।
रूपन्देही देवदह नगरपालिका १० आसाम टोलबाट करिब १ किलोग्राम गाँजा सहित २५ वर्षीय अर्जुन थापा र २१ वर्षीय शिशिर सेन्चुरी पक्राउ परेका हुन्। अस्थायी प्रहरी चौकी भलुहीबाट खटिएको प्रहरीले अर्जुनको घरमा उनीहरूलाई गाँजा सेवन गरिरहेको अवस्थामा फेला पारेको थियो।
यस्तै कपिलवस्तुको कपिलवस्तु नगरपालिका ११ जहदीबाट करिब ४ ग्राम अवैध लागुऔषध ब्राउन सुगर जस्तो देखिने पदार्थ सहित रूपन्देही गैडहवा गाउँपालिका ९ धुसुवा बस्ने २७ वर्षीय लक्ष्मण पन्थी र सोही ठाउँ बस्ने ३५ वर्षीय दुर्गा राना मगर रहेका छन्।
भे।५ प ५१६० नम्बरको मोटरसाइकललाई अस्थायी प्रहरी पोष्ट जहदीबाट खटिएको प्रहरीले जाँच गर्ने क्रममा मोटरसाइकलमा सवार उनीहरूलाई उक्त पदार्थ सहित फेला पारी पक्राउ गरेको हो।
त्यसैगरी पर्सा वीरगञ्ज महानगरपालिका १६ रजतजयन्ती चोकबाट करिब ६ ग्राम अवैध लागुऔषध खैरो हेरोइन सहित मकवानपुर हेटौंडा उपमहानगरपालिका २ बस्ने २३ वर्षीय प्रवीण तामाङ र सोही उपमहानगरपालिका १० बसपार्क बस्ने २१ वर्षीय उमेश लामा पक्राउ परे।
बा।८६ प ५०८७ नम्बरको मोटरसाइकलमा सवार उनीहरूलाई प्रहरी चौकी इनर्वाबाट खटिएको प्रहरीले जाँच गर्ने क्रममा उक्त लागुऔषध सहित फेला पारी पक्राउ गरेको हो। यस सम्बन्धमा प्रहरीले थप अनुसन्धान गरिरहेको जनाइएको छ।
प्रतिक्रिया