खाँदबारी । योगमाया आयुर्वेद विश्वविद्यालयको अध्यक्षमा डा. अर्जुनकुमार कार्की नियुक्त भएका छन् । शिक्षा, विज्ञान तथा प्रबिधि मंत्रालय सिंहदरबारमा मंगलबार भएको योगमाया आयुर्वेद विश्वविद्यालयको परिषद बैठकले कार्कीलाई विश्वविद्यालको अध्यक्ष बनाउने निर्णय गरेको हो ।

अमेरिकाका लागि पुर्व राजदूतको जिम्मेवारी सम्हालिसकेका डा. कार्कीलाई आयुर्वेद विश्वविद्यालयको जिम्मेवारी दिएको हो । कार्कीले विश्वबिद्यालयको नेतृत्व लिन, सुझाब, सल्लाह र दबाब सम्म दिनु हुने सङ्खुवासभावासी तथा अरूण उपत्यकावासीलाई धन्यवाद दिएका छन् । योगमाया आयुर्वेद विश्वविद्यालयको नेतृत्व लिँदा विश्वविद्यालयको विकास र विस्तारमा थप योगदान पुग्ने विश्वास लिइएको उनले बताए । कार्कीले ग्रामीण पुनर्निर्माण नेपाल (आरआरएन) नामक संस्थाको कार्यकारी अध्यक्ष रहेर पूर्वी पहाडी तथा हिमाली जिल्लामा लामो समय काम गरेका थिए । लामो समय देखि अलमलमा रहेको योगमाया आयुर्वेद विश्वविद्यालयको सञ्चालन प्रकृयाले अब गति लिने भन्दै अरुण उपत्यकावासी उत्साही भएका छन् । भोजपुरमा जन्मिएकी विदुषी योगमायाको नाममा खुलेको आयुर्वेद विश्वविद्यालयको सञ्चालनका लागि सङ्खुवासभा र भोजपुरका केहि जग्गा गरिद कार्य समेत भएको छ । कार्कीको नेतृत्वमा योगमाया आयुर्वेद विश्वविद्यालयले छिट्टै गति लिने आशा, भरोसा र अपेक्षा राखिएको छ ।

योगमाया आयुर्वेद विश्वविद्यालय सञ्चालनका लागि डा. मातृका तिम्सिना, भविन्द्र अधिकारी इतिहासविद् डा. रमेश ढुंगेल, पूर्वसचिव सूर्यप्रसाद गौतमलगायतका व्यक्तिहरूको महत्त्वपूर्ण भूमिका रहेको छ । योगमाया आयुर्वेद विश्वविद्यालय आयुर्वेद पढ्नेका लागि शैक्षिक हब बन्ने हिमालय किरण क्याम्सका संस्थापक क्याम्पस प्रमुख समेत रहेका डा. मातृका तिम्सिनाले बताए । जडिवुटीहरुको भण्डार रहेको अरुण उपत्याकामा आयुर्वेद विश्वविद्यालय सञ्चालनमा आउँदा यहाँका जडिवुटीहरुले मुल्य पाउने तिम्सिनाको भनाई छ । आन्तरिकबाहेक बाह्य विद्यार्थीलाई पनि आकर्षण गर्ने हिसाबले विश्वविद्यालयको आवश्यकता रहेको उनले बताए ।

सङ्खुवासभा जिल्लाको खाँदबारी नगरपालिका–९ र भोजपुर जिल्लाको षडानन्द नगरपालिका– ६ मा केन्द्र रहने गरी विदुषी योगमाया आयुर्वेद विश्वविद्यालय स्थापना हुने छ । विश्वविद्यालयका लागि आवश्यकमध्ये भोजपुरमा २ सय ३३ र सङ्खुवासभामा ३ सय ७२ रोपनी जग्गा अधिग्रहणका लागि रकम निर्धारण गरी अधिकाम्स जग्गा प्राप्ति भएको छ । तर, अझै कतिपय जग्गा विश्वविद्यालयको नाममा ल्याइसकिएको छैन । भवनलगायतका भौतिक पूर्वाधार निर्माणको कामसमेत अघि बढ्न सकेको छैन ।

तत्कालीन समाजमा विद्यमान अन्याय, अत्याचार, भ्रष्टाचार, महिला हिंसा, लैङ्गिक विभेद तथा जातीय उत्पीडन आदि विकृतिविरुद्ध योग, ध्यान र भजन कीर्तनका माध्यमबाट आध्यात्मिक तवरले आवाज बुलन्द गर्न विदुषी योगमाया न्यौपानेले महत्वपुर्ण भुमिका निर्वाह गरेकी थिइन् । न्यौपानेले समाज सुधारका लागि जीवनभर सङ्घर्ष गरेर आफ्ना ६७ जना अनुयायीसहित अरूण नदीमा जलसमाधि लिई प्राणको आहुति दिएकी थिइन् । क्रान्तिप्रतीक योगमायाको नाममा आयुर्वेद विश्वविद्यालय स्थापना गरेर पूर्वीय दर्शनमा आधारित हाम्रो मौलिक ज्ञानलाई युगसापेक्ष विस्तार गर्दै समाज रूपान्तरणमा योगदान पु¥याउने अभिप्रायका साथ सुरु भएको यो विश्वविद्यालय स्थापनाको अभियानले सार्थकता पाउन लागेको छ ।