खाँदबारी । सङ्खुवासभाको खाँदबारीमा सम्पन्न दोस्रो आमन्त्रित तीनपोखरी कप फुटबल प्रतियोगिताको उपाधि चुलाचुली स्पोर्टिङ क्लब झापाले हासिल गर्न सफल भएको छ । खाँदबारी रङ्गशालामा मंगलबार भएको खेलमा आयोजक तीनपोखरी समाज विकास क्लब खाँदबारीलाई पराजित गर्दै चुलाचुलीले उपाधि हात पारेको हो ।
उपाधि जितेको चुलाचुलीले पुरस्कार स्वरुप नगद दुई लाख २५ हजार, ट्रफि, मेडल र प्रमाणपत्र प्राप्त गरेको छ । उपविजेतामा चित्त बुझाएको तीनपोखरीले नगद एक लाख १० हजार सहित ट्रफि, मेडल, प्रमाणपत्र प्राप्त गरेको छ । फाइनल खेलमा झापाको चुलाचुली स्पोर्टिङ क्लवले आयोजक तीनपोखरी समाज विकास क्लब खाँदबारीलाई २–१ गोल अन्तरले पराजित गर्दै दोस्रो आमन्त्रित तीनपोखरी कप फुटबलको विजेता भएको हो । त्यस्तै गरी सेमिफाइनलिष्ट ससस्त्र प्रहरीको कोशी प्रदेश एपिएफ र मोरङको भांसाबारी फुटबल क्लवले नगद २५–२५ हजार रुपैयाँ ट्रफि, मेडल र प्रमाणपत्र प्राप्त गरेका छन् ।
प्रतियोगितामा विभिन्न विधामा खेलाडिहरुले ट्रफि, मेडल तथा प्रमाण पत्र प्राप्त गरेका थिए । फाइनल खेलको म्यान अफ दी म्याच चुलाचुलीका निश्चल बस्नेत घोषित भएका थिए भने चुलाचुली कै तिर्थ बस्नेत सार्वाधिक गोलकर्ता र मौसाम लिम्बु उत्कृष्ठ गोल रक्षक घोषित भएका थिए । त्यसैगरी आयोजकका अभिसेक खड्का सर्वोत्कृठ खेलाडीमा पुरस्कृत भएका थिए।
पुष २६ गतेदेखि सुरु भएको प्रतियोगितामा कोशी प्रदेशका विभिन्न जिल्लाका ८ क्लबको सहभागिता रहेको प्रतियोगिता आयोजक तीनपोखरी समाज विकास क्लवका अध्यक्ष मिनेश चापागाईले बताए ।
प्रतिक्रिया