सङ्खुवासभा, जेठ २४ गते । स्थानीय पाठ्यक्रम अन्तर्गत संखुवासभामा अध्यापन गराउँदै आएको कुलुङ भाषाको पाठ्यपुस्तक विद्यालयमा नपुग्दा पठनपाठनमा समस्या परेको छ । थुप्रै विद्यालयहरुमा कुलुङ भाषाको पाठ्यपुस्तक पढाईदै आएपनि आवश्यकता अनुसार पुस्तक नहुँदा समस्या परेको हो ।

विद्यालयलाई आवश्यक पर्ने पुस्तक मगाईए पनि समयमा आईनपुग्दा शिक्षण कृयाकलापमा असर पुगेको विषय शिक्षकहरु बताउने गरेका छन् । विद्यालयमा पुस्तक नआईपुगेकोले फोटोकपी गरेर पढाउनु परिरहेको शिक्षक गंगाकुमार कुलुङले बताउनुभयो । ‘पाठ्क्रमको आधारमा पाठ्यपुस्तक विना नै पढाउन पनि सकिन्छ, तर प्रभावकारी हुदैन’, शिक्षक कुलुङको भनाई छ । विद्यार्थीहरु आफ्नो भाषाबाट पढन पाउँदा अत्यन्तै चाख दिएर पढ्ने गरेपनि पुस्तक मागेर हैरान लगाएको अनुभव शिक्षक कुलुङले सुनाउनुभयो ।

स्थानीय पाठ्यक्रमको लागि अन्य अनिवार्य विषयको पुस्तकहरु जस्तो डिलरमा नआउने भएकोले पुस्तक अभाव भएको विद्यालयका प्रधानाध्यापकहरुले बताउने गरेका छन् । विद्यार्थी संख्याको आधारमा विद्यालयले पाठ्यक्रम विकास केन्द्रमा मगाउन पर्ने हुँदा विद्यालयमा सहज रुपमा पुस्तक आउन नसकेको शिक्षक चार बर्षदेखि कुलुङ भाषा अध्यापन गराईरहेको प्रधानाध्यापक बुद्धि कुलुङ बताउनुहन्छ । पाठ्क्रम विकास केन्द्रले पुस्तक छापिदिए पनि झण्झटिलो प्रकृयाको कारण विद्यालयले समयमा नै पुस्तक नपाएको शिक्षक कुलुङको भनाई छ । अझै पनि पुस्तक विद्यालयमा नपुग्दा पहिलो चरणको परिक्षा नै प्रभावित हुने शिक्षकहरु बताउछन् ।

सङ्खुवासभाको कुलुङ समुदायको विद्यार्थीहरुको मात्र उपस्थिती हुने क्षेत्रमा चार बर्षदेखि कुलुङ भाषाको पुस्तक अध्यापन गराईरहेका छन् । यसअघि सङ्खुवासभाका ८ विद्यालयमा स्थानीय पाठ्यक्रम अन्तर्गत कुलुङ भाषाको पाठ्यपुस्त अध्यापन गराईरहेकोमा यस बर्ष १४ विद्यालयमा मातृभाषा पढाउन लागेको कुलुङ संघ सङ्खुवासभाका अध्यक्ष लाकपद कुलुङले जानकारी दिनुभयो । सङ्खुवासभाको शिलिचोङ र मकालु गाउँपालिकामा कुलुङ मातृभाषा अध्यापन गराईरहेका छन् ।