संखुवासभा । संखुवासभाको मादी नगरपालिकामा जन्मिएर प्रवास हङकङ्लाई दुई दशक देखि कर्मथलो बनाइरहेका साहित्यकार दाजु गुरुङको ‘टाँकीका फूलहरु’ नामक कथासंग्रहको तेस्रो संस्करण बजारमा आएको छ ।
आम मानिसहरुले धेरै मनपराएपछि माग बढेकाले भर्खरै मात्र तेस्रो संस्करण बजार ल्याएको कथाकार गुरुङले बताए । एक बर्षको अवधिमा तेस्रो संस्करण आउनुले पुस्तकको चर्चा चलेको छ । ‘टाँकीका फूलहरु’ नामक कथा संग्रहमा नेपालका विभिन्न जिल्ला र गाऊँबस्तीहरुबाट प्रवास हङ्कङ्मा पुगेर त्यहाँ गरिने दुःख, मेहनत र परिश्रमका कथाहरुलाई सिलसिलेवार ढंगले प्रस्तुत गरेका छन् । आम मानिसहरुको सपना डलर कमाउने, धनी बन्ने र सुखी परिवारको कल्पना हुन्छ । दाजु गुरुङको पनि त्यस्तै सपना छ तर टाँकीका फूलहरु टिप्दा–टिप्र्दै समयले फड्को मारेको पत्तै पाएका छैनन् । पुस्तकको नाम नै ‘टाँकीका फूलहरु’ रहनुको रहस्य चाँही हङ्कङ् डलरमा हाम्रै गाउँबेसीमा फुल्ने टाँकीका फूलको चित्र छ । त्यसैले सोही टाँकीका फूल अर्थात डलरबाट नै पुस्तकको नाम राखिएको हो । डलर कमाउन गरिने दुःखका कथाहरु पुस्तकमा समेटिएको छ ।
पुस्तकमा आरम्भ, मेरो छिमेकी र रोक्सी, हराएको मान्छे, मोनिका, बिर्सिएका साँझ, मिलेनियम, ब्याज, मुन्ना चौधरी, सतासी मामा, सुनाखरी ओइलाएपछि, चोइ–साम, मङ्की हिल, मौइसी, सरी, मर्निङ वाक, ब्लाक र बाटो बिराएको मान्छे गरि पुस्तकमा जम्मा १७ वटा कथाहरु समेटेका छन् । धेरै जति कथामा म पात्रको प्रयोग गरिएको छ । कथाका विम्बहरु राम्रा छन् । शब्द चयन लोभलाग्दो छ । पुस्तक खोलेपछि पहिलो कथा आरम्भको शुरुवात हुन्छ । उक्त शिर्षकमा हाम्रो गाउँबेसी देखि रहर बोकेर हङकङ् छिरेपछि त्यहाँ छानाबाट भंगेरा झर्ने गर्मी, कंक्रिटको शहरको वातावरणको बारेमा सविस्तार सिलेसिलेवार ढंगले प्रस्तुत गरेका छन । एकपछि अर्को कथा पढ्दै जाँदा दिक्क लाग्दो छैन् । अर्को नयाँ शिर्षकको कथा कस्तो होला भन्ने जिज्ञासाले सताउँछ । तत्कालै पुरै पुस्तक नै पढिसक्न पाएपनि हुन्थ्यिो भन्ने हुटहुटी चाँही बनाइरहन्छ ।
संखुवासभाको कथाकार गुरुङ लामो समयदेखि हङहङ् बसेपछि कतिपय कथाहरु गाउँको झल्को दिने समेत छ । विशेषः गरि नेपालबाट हङकङ् गएर गरिने दुःख र परिश्रमका कथालाई मिठासपूर्ण ढंगले प्रस्तुत गरेका छन् । पछिल्लो समयमा हङ्कङ्मा नेपाली साहित्य फैलाउदै गएको छ । प्रवास हङकङ्मा बसेर नेपाली साहित्यको जर्गेर्ना गर्नु आफैमा राम्रो हो । दिनभरिको डिउटी सकाएर साहित्य सिर्जना गर्नु चानचुने काम होइन । पहिलेदेखि नै कविता र गीत लेखनमा सौखिन दाजु गुरुङको कृतिको हिसाबले ‘टाँकीका फूलहरु’ कथासंग्रह पहिलो हो ।
कथाकार गुरुङको लेखनी स्तरीय छ भन्ने कुरा पुस्तकले समेत प्रमाणित गरेको छ । पारिवारिक हिसाबले जेठो छोरो भएपछि बुबाआमा, भाइबहिनीहरुको अभिभावकत्वले गर्दा बाध्यतामा विदेशीनु परेको आफ्ना दुःखहरु समेत कथाको रुपमा समेटिएका छन । केही समयको लागि विदेशीने र थोरबहुत अर्थ संकलनपछि नेपालमा नै केही काम गर्ने उद्धेश्य बोकेका कथाकार गुरुङ समयसंगै प्रवासमा नै अल्झिरहेको समेत कथामा रोमाञ्चक तरिकाले प्रस्तुत गरेका छन । उनका कथाहरु सरल छन जो सुकैले पढ्दा सरल तरिकाले बुझन सकिन्छ । आफ्ना अनुभवहरुलाई सरल तरिकाले कथाको रुपमा प्रस्तुत गरिएको छ । नेपालबाट हङ्कङ् जान मरिहत्ते गर्ने, हङ्कङ् आइडी बनाउदा भोग्नु पर्ने दुःख, १२ देखी १८ घण्टा सम्मको ड्यूटी कारण श्रीमान श्रीमती बिचको शंकाआशंका, पारिवारिक समस्याहरु, बुबाआमाको डिउटीका कारण छोराछोरीहरु दुब्र्यसनी बन्ने, कुलतमा फस्ने र नेपालबाट घरेलु कामदारको रुपमा हङ्कङ् जाने चेलीहरु आफ्नो उमेरको ख्यालै नगरी उमेर ढल्केका बुढोहरुसंग विवाह गर्ने त्यसपछिका धोका र विभिन्न समस्या लगायतका कुराहरुलाई कथाको रुपमा प्रस्तुत गरिएको छ । पुस्तकमा प्रशस्त मात्रमा रोमाञ्चकता, हस्यौली र ठठ्ठा, यौवन र युवतीको कुराहरुलाई समेत मिठासपूर्ण ढंगले कथाको रुपमा प्रस्तुत गरिएको छ । साह्रै सरल र मिठा कथाहरु प्रस्तुत गरिएको छ । पुस्तक शुरु गरेपछि त्यसपछि के होला भन्ने उत्सुकता हुदा–हुदै पुस्तक समापन हुन्छ । जुन सबैभन्दा राम्रो पक्ष हो ।
साहित्यमा रुची राख्ने कथाकार गुरुङ हङ्कङ्मा हुने जुनसुकै साहित्यिक मञ्चमा सहभागी हुन्छन । दर्जनौं गीत र कविता लेखिसकेका दाजु गुरुङको बाँडिएको टाँकीका फूलहरु कथासंग्रह पठनीय छ । भुडी पुराणले प्रकाशन गरेको पुस्तकको मूल्य २ सय ५० रुपैया तोकीएको छ ।
प्रतिक्रिया