सङ्खुवासभा । सङ्खुवासभामा उभौली र उधौलीको सुचकको रुपमा भेडालाई लिईन्छ । उभौली लागेसँगै भेडीगोठ लेक र उधौली लागे लगत्तै बेँशी झार्ने गरिन्छ । जिल्लाको सिलिचोङ गाउँपालिका क्षेत्रका कतिपय बुढाबुढीले भेडीगोठ लेक तिर लगेको र बेँशी झारेको आधारमा उभौली र उधौलीको पहिचान गर्छन् ।
यस बर्षको उभौलीमा पनि भेडीगोठ लेक तिर सार्न थालिएको छ । आधा बर्ष हिमाली क्षेत्र र आधा तल्लो क्षेत्रमा राखिने भेडिगोठ झण्डै ६ महिनाको लागि लेक उकाल्न थालिएको हो । सयौंको संख्यामा पालिएको भेडा सङ्खुवा खोलाको शिरानसम्म पुराएर पुनः उधौलीमा झार्ने गरिन्छ । उभौलीको समयमा हिमालमा हिउँ पग्लिने र खुल्ला हुने भएकोले उच्च हिमाली क्षेत्रमा लगिने गरेको भेडा पालकहरु बताउछन् । हिउँदको समय सुरु भएपश्चात हिमालमा हिउँ पर्ने हुँदा भेडी गोठ ओरालो झार्ने गरिएको सिलिचोङ गाउँपालिका ३ ताम्कुका भेडा पालक तुलाबहादुर कुलुङ बताउनुहुन्छ । भेडा चिसो हावापानीमा बस्न रुचाउने भएकोले पनि उकालो र ओरालो गरिराख्नु परेको उहाँको भनाई छ ।
ब्यावसायिक रुपमा पालिएको भेडा एक ठाउँबाट अर्को ठाउँमा सार्दै राखे रोग लाग्ने सम्भावना कम हुने गरेको अर्का भेडा पालक टेकबहादुर कलुङले बताउनुभयो । ठुलो संख्यामा पालिएको भेडालाई घाँस पानी पुराउन मुस्किल हुने, खुल्ला ठाउँमा पालिएको भेडा बलियो र राम्रो हुनेहुँदा लेकबेँशी गर्नु परेको उहाँले बताउनुभयो ।
भेडीगोठ लेकबेँशी गर्ने क्रममा विचमा रहेको खर्कहरुमा राख्दै लगिन्छ । ठाउँको पर्याप्तता अनुसार ३ देखि ५ रातसम्म उक्त खर्कमा राख्ने गरिन्छ । त्यहाँको घाँसपात पनि सकिएपछि फेरि अर्को खर्कमा लैजाने गरेको भेडा पालकहरु बताउछन् । खर्क सार्दा बाटो चिन्ने केही भेडाहरु अगाडी हिँडेपछि अरुले पछ्याउने हुँदा थोरै जनशक्तिले पनि सयौँ भेडाको गोठालो गर्न सकिने टेकबहादुर कुलुङले अनुभव सुनाउनुभयो ।
जेठमा लेक उकाल्न सुरु गरिएको भेडी गोठ असोजमा बेँशी झार्ने गरिन्छ । पछिल्लो समय भेडाको माग अत्याधिक रहेपनि ब्यावसायीक रुपमा भेडा पालन गर्नेहरुको अभाव भएपछि माग पुर्ती हुन सकेको छैन । भेडापालनबाट मासु बाहेक ऊन र घ्युबाट राम्रो आमदानी लिन सकिन्छ । भेडाको घ्यु औषधीको रुपमा समेत प्रयोग गरिदै आएको छ ।
प्रतिक्रिया