इटहरी । इटहरी उपमहानगरका प्रमुख द्वारिकलाल चौधरी स्वास्थ्यकर्मीको टोलीसहित संक्रमितको घरमा पुग्न थालेका छन्।
कोरोना संक्रमितहरूलाई मनोबल प्रदान गर्न र स्वास्थ्योपचार र थप परामर्श दिन उनी स्वास्थ्यकर्मीको टोलीसहित घरैमा स्वास्थ्यलाभ गरिरहेका जनप्रतिनिधि र सर्वसाधारण नागरिकका घरैमा पुगेका हुन्।
इटहरी अस्पतालका इमरजेन्सी इन्चार्ज रामकुमार धमलाको नेतृत्वमा गएको स्वास्थ्यकर्मीको टोलीले कोरोना संक्रमित इटहरी(१४ का वडा सदस्य दुखीलाल चौधरी, इटहरी ५ का सदस्यद्वय ईश्वर विक्रम शाह, सन्तोष पराजुलीका घरैमा पुगेर स्वास्थ्य परामर्श दिएको छ।
टोलीले संक्रमितहरूको स्वास्थ्य अवस्थाको जानकारी लिएर आवश्यक औषधि, सल्लाह सुझावसमेत दिएको थियो।
यस्तै, इटहरी ९ कपिल घिमिरे, इटहरी ५ ज्योति माविका पूर्व प्रअ भैरव सापकोटा र इटहरी६ का गणेश गुरुङको घरमा पुगी प्रमुख चौधरीले उच्च मनोबलका साथ कोरोनालाई परास्त गर्न हौसला प्रदान गरेका हुन्। यसअघि पनि इटहरीका नगरप्रमुख चौधरी संक्रमितलाई भेट्न घरैमा पुग्ने गरेका थिए। इटहरी वडा नम्बर १३, १६ र १७ का संक्रमितका ६ वटा घरमा पुगेर मनोबल उच्च राख्न सल्लाह दिएका थिए।
प्रतिक्रिया