ताप्लेजुङ । फुङलिङ नगरपालिका–८ दोखुमा शनिबार बिहान टेम्पो पल्टिँदा माबली बाजे र नातिको मृत्यु भएको छ । चालक गम्भीर घाइते भएका छन् ।
सुकेटार विमानस्थलबाट जहाजमार्फत काठमाडौं उपचारका लागि हिँडेका पाथिभरा याङवरक गाउँपालिका–१ नाङखोल्याङका ७५ वर्षीय धनबहादुर गुरुङ र उनलाई पुर्याउन हिँडेका फुङलिङ नगरपालिका ८ दोखुका ११ वर्षीय इशान गुरुङको घटनास्थलमै मृत्यु भएको प्रहरी नायब उपरीक्षक कैलाश राईले जानकारी दिए । नाङखोल्याङमै घर भएका टेम्पो चालक गंगाराम राईको जिल्ला अस्पताल ताप्लेजुङमा उपचार भइरहेको छ ।
टेम्पो सडकदेखि झन्डै दुई सय मिटर तल झरेको स्थानीयले बताएका छन् । स्थानीय अमर विश्वकर्माका अनुसार टेम्पो ढुंगामा उछिटिएर खसेको अनुमान गरिएको छ । ००२/००३/ह ३९०० नम्बरको टेम्पो पल्टिएको हो ।
टेम्पो खसेको देख्नासाथ आफूहरु घटनास्थलमा गएर चालकलाई अस्पताल पठाएको तर बाजे र नातिको घटनास्थलमै मृत्यु भएको पाइएको विश्वकर्माले बताए ।
प्रतिक्रिया