बुटवल : माघे संक्रान्तिका लागि बुटवलमा मात्रै करिब नौ करोडको सखरखण्ड आयात भएको छ । बुटवल कृषि उपज तथा थोकबजार केन्द्रमा माघे संक्रान्तिलाई लक्ष्य गरी पुस २५ गतेबाट सख्खरखण्ड र तरुलको कारोबार हुन थालेको हो । यो पटक कृषि उपजमा दुई हजार टन सख्खरखण्ड भारतबाट आयात भएको छ ।
नेपालमा उत्पादित सख्खरखण्ड थोकबजारमा नभएको केन्द्रका अध्यक्ष कलाधर पन्थीले बताए । ‘स्वदेशी उत्पादनको सख्खरखण्ड ठूलो एकादशीमै खपत भयो । केही त्यसपछि बिक्री भयो’, उनले भने, ‘माघे संक्रान्तिको लागि नेपाली उत्पादन छैन ।’ कृषि उपज तथा थोकबजारमा सख्खरखण्डको मूल्य ४० देखि ५० रुपैयाँमा बिक्री हुन्छ ।
कृषि उपज केन्द्रमा स्वदेशी सख्खरखण्ड नभए पनि बाहिर हाटबजार, ठेलामा भने बिक्री गरिएको छ । ट्राफिकचोकमा ठेला राखेकी लक्ष्मी खड्काले भनिन्, ‘भारतको उत्पादनसँगै चितवनबाट आएको सख्खरखण्ड बिक्री भइरहेको छ ।’ कृषि थोकबजारमा बिक्री हुने सख्खरखण्ड भारतीय उत्पादन भए पनि तरुल भने स्वदेशी उत्पादन नै हो । यसपटक ७० देखि ८० टन तरुल थोक बजार केन्द्रमार्फत कारोबार भएको कृषि उपज केन्द्रका अध्यक्ष पन्थीले बताए । पाल्पाको तरुल बढीमात्रामा आएको छ ।
थोक बजार केन्द्रमा रहेका व्यापारी मोलाह सैजादले बिक्रीका लागि १५ क्विन्टल तरुल र २० क्विन्टल सख्खर खण्ड राखेका छन् । ‘यो साल अलि कम बिक्री भएको छ’, उनले भने, ‘अघिल्लो दिनसम्म सख्खरखण्ड १० क्विन्टल बिक्री भयो १० क्विन्टल बचेछ । तरुल पनि आधाजसो मात्र बिक्री भएको छ ।’ केही संक्रान्तिका दिनसम्म बिक्री होला भन्ने उनमा आशा छ ।
सक्रान्तिको अघिल्लो दिन थोकबजार बाहिर खुद्रा बजारमा तरुल र सख्खरखण्ड किनमेल भइरहेको थियो । हप्ताको एक दिन सोमबार बुटवलका मुख्य बजार क्षेत्रका पसलहरु बन्द भए पनि ट्राफिकचोक, बीपीचोकलगायत क्षेत्रका सडकमा भने माघे संक्रान्तीको लागि किनमेल चलिरहेको थियो । सडक पेटी तथा ठेलामा तरुल, सखरखण्डको चाङ थियो ।
बुटवल ट्राफिकचोकबाट बीपीचोकतर्फ जाने सडकमा लक्ष्मी खड्काले ठेलामा माघे संक्रान्तिका लागि कन्दमुल राखेकी थिइन् । सख्खरखण्ड सय रुपैयाँको डेढ किलो, पिंडालु ८० रुपैयाँ किलो, बन तरुल तीन सय र रातो तरुल दुई सय रुपैयाँमा बिक्री हुन्छ । तर विगतमा जस्तो ब्यापार नभएको उनीहरू बताउँछन् ।
प्रतिक्रिया