सङ्खुवासभा । जिल्लाको सिलिचोङ गाउँपालिका २ बालाको डाडाँगाउँमा राखिएको स्काई मोबाईलयको टावरमा समस्या भएपछि सञ्चार सेवा अवरुद्ध भएको छ । एक हप्ता अघिदेखि समस्या भएपनि अहिलेसम्म मर्मत नहुँदा स्थानीय नागरिकहरु सम्पर्क विहिन भएका छन् ।
उक्त टावरबाट सिलिचोङ गाउँपालिका र भोजपुरको साल्पासिलिछो गाउँपालिकाको उत्तरी क्षेत्रका नागरिकहरुले सेवा लिदै आएका छन् । सञ्चार सेवा अवरुद्ध भए लगत्तै दुरसञ्चार कार्यालय खाँदबारीमा खबर गरिएको भएपनि अहिलेसम्म मर्मत गर्न नआएको सिलिचोङ २ का अध्यक्ष मोहन संशेर कुलुङले जानकारी दिनुभयो । खाँदबारी दुरसञ्चारमा जानकारी गराउँदा धनकुटाले सो टावर हेर्ने गरेकोले उतै खबर गर्नु पर्ने बताएको वडा अध्यक्ष कुलुङले जानकारी दिनुभयो । दुरसञ्चार धनकुटामा खबर गर्दा प्राविधिकहरुमा कोरोना संक्रमण देखिएकोले तत्काल मर्मत गर्न आउन नसक्ने बताएको वडा अध्यक्ष कुलुङले जानकारी दिनुभयो ।
यस विषयमा कुरा गर्न दुरसञ्चार प्राधिकरण धनकुटाका प्रमुख ज्ञाननाथ सापकोटासँग सम्पर्क प्रयास गरिएपनि सम्पर्क हुन सकेको छैन । प्राधिकरण कार्यालय खाँदबारीले भने यस समस्याको बारेमा धनकुटालाई खबर गरिसकेको र कतैबाट प्राविधिक खोजेर पठाईदिने बताएको खाँदबारी दुरसञ्चार कार्यालयका प्रमुख राधारमण भट्टराईले जानकारी दिनुभयो । सिडिएमएका सेवाहरु धनकुटा कार्यालयले हेर्दै आएकोले आफुहरुसँग त्यस विषयको प्राविधक नभएकोले मर्मत आफ्नो पहँच बाहिरको रहेको समेत भट्टराईले स्पष्ट पार्नुभयो ।
सङ्खुवासभाको माथिल्लो क्षेत्रहरुमा सिडिएमएको मात्र टावर राखिएको छ । यस क्षेत्रमा स्काई टावरको अन्य विकल्पहरु नभएपछि टावरमा समस्या अउदा लामो समयसम्म सञ्चार विहिन बन्दै आउनु परेको छ । मुख्य गरि मकालु गाउँपालिका, भोटखोला गाउँपालिका र सिलिचोङ गाउँपालिकाका नागरिकहरुले यस्तो समस्या भोग्दै आएका छन् ।
प्रतिक्रिया