खाँदबारी । सङ्खुवासभाको मादीमा खुल्ला राष्ट्रिय ब्याटमिन्टन प्रतियोगिता सुरु भएको छ । मादी नगरपालिकाको आयोजनामा विहिबारबाट प्रतियोगिताको आयोजना गरिएको हो ।
कोशी प्रदेश सरकारका आन्तरिक मामिला तथा कानुन मन्त्री रेवती रमण भण्डारीको उपस्थिति तथा मादी नगरपालिका प्रमुख जीवन लिङ्थेपको अध्यक्षतामा प्रतियोगिताको उद्घाटन गरिएको हो । कार्यक्रममा सङ्खुवासभा प्रदेश सभा (ख) का साँसद विदुर कुमार लिङ्थेपको समेत उपस्थिति रहेको थियो ।
खुल्ला पुरुष डबल, खुल्ला महिला डबल र खुल्ला भेटेरन्स गरि २ विधामा प्रतियोगिता सुरु गरिएको हो । खुल्ला पुरुष डबल तर्फ डिभिजन ए र वि गरि ४१ टिमको सहभागिता रहेको छ । खुल्ला महिला तर्फ ८ र भेटेरन्स डबल तर्फ ११ टिमको सहभागिता रहेको छ ।
प्रतियोगितामा सहभागि हुनको लागि कोशी, मधेष बागमती र गण्डकी प्रदेशबाट खेलाडीहरुको सहभागिता रहेको आयोजक मादी नगरपालिकाका प्रमुख जीवन लिङ्थेपले जानकारी दिनुभयो । प्रतियोगिता चैत्र ३ गते सम्पन्न हुनेछ ।
मेन्स डबल तर्फका प्रथम, द्वितीय र तृतीय हुने २ टिमले ट्रफि, मेडल र प्रमाणपत्र सहित नगद ७५, ५० र २०/२० हजार रुपैयाँ प्राप्त गर्नेछन् । मेन्स डबल भेटरन्स तर्फका प्रथम, द्वितीय र तृतीय हुने २ टिमले ट्रफि, मेडल र प्रमाणपत्र सहित नगद ५०, ३० र १०/१० हजार रुपैयाँ प्राप्त गर्नेछन् । त्यस्तै वोमन डबल तर्फ प्रथम, द्वितीय र तृतीय हुने २ टिमले ट्रफि, मेडल र प्रमाणपत्र सहित नगद ४०, ३०, १०/१० हजार रुपैयाँ प्राप्त गर्नेछन् ।
प्रतिक्रिया