चीन सरकारले अरुण किनारमा तटबन्द बनाई सडक विस्तार गरेपछि अरूणको मोड परिवर्तन हुँदा नेपाली भूमि कटान सुरु भएको छ । अरुण नदीले भोटखोला गाउँपालिका १, फेमीथांका क्षेत्रमा भूमि कटान गरेपछि सीमावर्ती गाउँ किमाथांकावासीले भूमि बचाउन तटबन्द लगाउन सुरु गरेका छन् । चीनले अरुण किनारमा तटबन्द बनाई रिउदेखि चाँगा बजारसम्म सडक विस्तार गरेको छ ।

नेपाली भूमिमा नदी छिरेपछि करिब एक रोपनीभन्दा बढी जग्गा कटान भइसकेको किमाथांकाका स्थानीय तेन्छेवी भोटेले जानकारी दिनुभयो । यो नदीलाई पुरानै वहावमा नर्फकाए फेमीथाङकाको करिब सयौं रोपनी भूमि खोलामा परिणात हुने भएकाले तटबन्द लगाउन सुरु गरेको भोटेले बताउनुभयो ।

गत वर्ष किमाथांका गाउँ विकास समितिको नौ लाख ८७ हजार र १० लाख बढी श्रमदान गरी एक सय मिटर तटबन्द लगाइएको थियो भने यो वर्ष ३४ मिटरको १२ फिट अग्लो पर्खाल लगाइएको छ ।गाविसको ११ लाख ५० हजार जिल्ला विकास समितिको सिँचाइ तथा नदी नियन्त्रण शीर्षकको नौ लाख ५० हजार र श्रमदान दुई लाख गरी २३ लाख लागतमा तटबन्द लगाइएको निर्माण समिति उपाध्यक्ष निमा नावाले जानकारी दिनुभयो ।

चीनबाट सिमेन्ट खरिद गरी तटबन्दमा प्रयोग गरिएको र केही मात्रामा खोला नियन्त्रण भएको निमाले बताउनुभयो । स्थानीयले आफ्नो भूमि बचाउन तत्काल १० मिटर तटबन्द लगाउने तयारी गरेको उहाँले जानकारी दिनुभयो ।सीमा जोडिएको चीन तर्फको चाँगा र देन्दाङ बजारमा भूकम्पपछि पुनर्निर्माणसँगै सहरीकरण तीव्र भएकाले नदीको ढुंगा, बालुवा जथाभावी संकलन गरिएको छ । त्यो कार्यले नेपालतर्फ नदीले मोड फेरेको स्थानीयको भनाइ छ ।

चिनियाँ निर्माण पक्षले अरुण नदीमै क्रसर मेसिन राखेको र खोलामै डोजर प्रयोग गरी बालुवा निकालेको भन्दै स्थानीय प्रशासनलाई रोक्न स्थानीयले अनुरोध गरेका छन् । चीनतर्फको नदी पूरै सोलिङ गरी तटबन्द लगाएको छ, हामीले पनि नियन्त्रणका लागि बलियो आधार नअपनाउने हो भने नाका सञ्चालनपछि नेपाली भूमि नरहने र व्यापारमा नकारात्मक प्रभाव पर्ने किमाथांकाका स्थानीय कामी नावाले बताउनुभयो ।

चीनले माथिल्लो सीमा कायम भएको कामु खोलालाई समेत छेकबार लगाउन सुरु गरेको छ । चीनतर्फ हाल चारवटा डोजरले खोला किनारमा रडछट सिमेन्टसहितको तटबन्द निर्माणलाई तीव्रता दिँदै आएको कामीले जानकारी दिनुभयो ।चीनसँगको नाकामध्ये सबैभन्दा होचो भूभागमा रहेको र कम हिमपात हुने भएकाले किमाथांका नाका भौगालिक हिसाबले उत्तम मानिन्छ ।
अन्नपूर्ण पोष्टबाट