काठमाण्डौ । प्रि मनसुन सुरु भइसकेकाले देशभर तापक्रम बढ्दै गएको छ भने बेलुका पख हावा चल्न थालेको छ । मनसुन अघिको समय प्रि मनसुनमा दिउँसो गर्मी धेरै हुने र त्यसपछि चट्याङ पर्ने हुन्छ ।
आज पनि पहाडी क्षेत्रका केही ठाउँमा मेघगर्जन र चट्याङ पर्ने सम्भावना रहेको मौसमविद् राजु प्रधानांगले जानकारी दिनुभयो । उहाँकाअनुसार तत्कालका लागि तीव्र गतिमा हावाहुरी चल्ने सम्भावना भने देखिएको छैन । तर, यो समयमा स्थानीय वायुको प्रभावका कारण जुनसुकै बेला पनि हुरी चल्ने जोखिम रहने भएकाले सचेत हुनुुपर्नेमा मौसमविद्को जोड छ ।
मार्च, अप्रिल र मे महिनालाई प्रि मनसुनको समय मानिन्छ । यसैबीच, आज हिजो-अस्ति जस्तो पारिलो घाम लागेको छैन । पश्चिमी न्यून चापीय प्रणालीको प्रभाव रहेकाले आज मौसम आंशिकदेखि सामान्य बद्ली हुने मौसमविद् राजु प्रधानांगले बताउनुभयो । उहाँका अनुसार आज सुदूरपश्चिम, कर्णाली, लुम्बिनी र गण्डकी प्रदेशका पहाडी क्षेत्रको मौसम आंशिक बद्ली हुनेछ ।यस्तै, सुदूरपश्चिम, कर्णाली, गण्डकी प्रदेश र प्रदेश १ का केही पहाडी क्षेत्रका एक दुई ठाउँमा मेघगर्जन र चट्याङसहित हल्का पानी पर्ने सम्भावना छ ।
प्रतिक्रिया