कञ्चनपुर । भारतबाट १० वर्षपछि दसैं मनाउन घर फर्किन लागेका कालिकोट फुकोट गाउँपालिका–२ का कुल दर्जीको परिवार महेन्द्रनगरमा लुटिएको छ ।

भारतको नैनीतालमा रोजगारी गरेर श्रीमती र दुई छोराछोरी लिएर दसैं मनाउन गाउँ फर्केका दर्जी नेपाल प्रवेश गरेको केही बेरमै लुटिएका हु्न् । भारतको हल्द्धवानी बसपार्कबाटसँगै आएका तीन जना नेपालीले लुटेको दर्जीले बताए ।

उहाँले भारु ४० हजार लुटिएको बताए । कालिकोट घर बताउने तीन जनाले महेन्द्रनगर पुगेपछि भारु साट्न भनेर दर्जीलाई सँगै लगेका थिए । ‘चिसो खाउँ भनेर खुवाए,’ उनले भने, ‘होस खुल्दा ४० हजार भारु लिएर उनीहरु हिँडिसकेका थिए ।’

खाना खाने होटलमा श्रीमती र छोराछोरी छाडेर उनीहरुसँगै पैसा साट्न गएका दर्जीको सबै कमाई लुटिएपछि समस्यामा परेका छन् । घर पुग्ने भाडासमेत नभएपछि विचिल्लीमा परेका उनीहरुलाई निड्स नेपाल, होटेल र यातायात व्यवसायीले घर पठाउने व्यवस्था गरेका थिए ।

दसैं, तिहारका लागि भारतबाट घर फर्कने नेपाली विगतमा जस्तै सीमा क्षेत्रमा लुटिने क्रम रोकिएको छैन् । लुटेरा समुहले भारतको बसपार्कदेखि नै पिछा गर्दै सके उतै नसके नेपालसम्म पुगेर लुटपाट गर्ने गरेका छन् ।

यात्रामा नजिकिएका व्यक्तिले नै लुटपाट गरेको घटना बढी छ । दर्जीजस्तै भारतमा रोजगारी गरि घर फर्किएका संखुवासभाका ५० वर्षीय कृष्ण गुरुङ्ग र बैतडीका २८ बर्षीय वीरबहादुर चन्द पनि सीमामा लुटिनुभएको छ ।