नेकपा एमालेका अध्यक्ष केपी शर्मा ओलीले पार्टीका केही नेता प्रतिक्रियावादीको पुच्छर भएर हिँडेको आरोप लगाएका छन्। प्रतिक्रियावादीसँग मिलेर सरकार ढालेको र पार्टी फुटाएको उनले बताए। ‘त्यस्ता तत्वहरुको पछि लागेर आन्दोलन र आफ्नो भविष्य कमजोर नपार्नुस् साथीहरु पार्टीमा फर्किनुस् पार्टीले क्षमा गर्छ’, अनेमसंघको भर्चुअल बैठकमा बोल्दै ओलीले भने, ‘साथीहरु जे गल्ति गर्नु भयो गर्नु भयो पार्टीमा फर्किनुस्। पार्टीमा फर्कने साथीहरुलाई यी अपराध कर्मको कमिटीले माफी दिन्छ।‘

माधव नेपाल पार्टी, कमिटी भन्दा माथि हुन खोजेको आरोप लगाए। ‘एक जनाले भनेछन् महाराज खुसी भए अरे, माफी दिन्छ अरे महाराजले हामीलाई भन्दै खिल्ली उडाए। उनी अपराध गर्न सक्ने पार्टीसँग गल्ती भयो भन्न नसक्ने,‘ ओलीले नेपालप्रति कटाक्ष गर्दै भने।

नेपाल आफूलाई एमाले भन्दै विपक्षी मोर्चाको गठबन्धमा सामेल हुँदै पार्टीमा यो चाहियो उ चाहियो भन्ने गरेको भन्दै आक्रोस व्यक्त गरे। ‘एमालेलाई कसरी उठ्न नदिने भनेर षडयन्त्र गर्न बालुवाटार पुगेर विपक्षी मोर्चामा गजक्क परेर बस्न लाज पनि नहुने। बाहिर निस्केर मैले एमाले छोडेको छैन एमाले नै हुँ नि भन्न लाज पनि नहुने। यो निर्लज्ज स्थतिबाट पार्टी र आन्दोलनलाई मुक्त गर्नु पर्छ। यो लामो समय यसरी चल्न सक्दैन’, ओलीले भने।