धनकुटा । धनकुटाको पाख्रीवास नगरपालिका–४ मा जुवा खेलिरहेको अवस्थामा प्रहरीले छापा मारेर १५ जनालाई पक्राउ गरेको छ। प्रहरीले जुवाको खालबाट १६ हजार ५ सय रुपैयाँसहित पक्राउ परेकाहरूको साथबाट गरी ३ लाख १३ हजार ३ सय रुपैयाँ नगद बरामद गरेको छ।
स्थानीय गणेश गुरुङको घरमा जुवा खेलिरहेको सूचनाका आधारमा प्रहरीले गएराति करिब २ बजे छापा मारेको हो। सो क्रममा पाख्रीवास नगरपालिका–६ का ४२ वर्षीय बुद्धिमान राई, ६५ वर्षीय डिकबहादुर बस्नेत तथा पाख्रीवास–८ मुगाका ३३ वर्षीय रञ्जित राई, ५३ वर्षीय सिंहराज घिसिङ, ३६ वर्षीय जीवन राई, ३४ वर्षीय दिनेश राई र ३८ वर्षीय नगेन्द्र राई पक्राउ परेका छन्।
त्यसैगरी पाख्रीवास–४ बुद्धचोकका ३९ वर्षीय रबिकुमार राई, ५२ वर्षीय लालबहादुर पाख्रिन, ४८ वर्षीय राजकुमार निरौला, ४६ वर्षीय पूर्णबहादुर गुरुङ, ४२ वर्षीय देवेन्द्र पौडेल, ४२ वर्षीया सुम्निमा लिम्बू तथा धनकुटा नगरपालिका–१ हिलेका ५३ वर्षीय नन्दकुमार तामाङ र ५८ वर्षीय टिकाराम तामाङलाई पनि प्रहरीले पक्राउ गरेको छ।
प्रहरीले जुवा खेलिरहेको स्थानबाट १६ वटा कौडा र १६ हजार ५ सय रुपैयाँ नगद बरामद गरेको छ। पक्राउ परेका व्यक्तिहरूको साथबाट थप २ लाख ९६ हजार ८ सय रुपैयाँ बरामद भएको धनकुटाका प्रहरी प्रवक्ता डीएसपी हेमन्त भण्डारी क्षेत्रीले जानकारी दिए।
प्रतिक्रिया