काठमाडौं । खाँदबारी सेवा समाजले संखुवासभामा जन्मिएर राष्ट्रिय तथा अन्तर्राष्ट्रियस्तरमा विभिन्न क्षेत्रमा पहिचान बनाउन सफल व्यक्तित्वहरूलाई सम्मान गरेको छ। समाजले शनिबार काठमाडौंमा एक कार्यक्रम आयोजना गरी विभिन्न क्षेत्रमा विशिष्ट योगदान पुर्याएका व्यक्तित्वहरूलाई सम्मान गरेको हो।
सम्मानित हुनेहरूमा संघीय सांसदद्वय डा. अर्जुनकुमार कार्की र डा. सुजता तामाङ, प्रशासकीय अदालतका अध्यक्ष डा. टेकबहादुर घिमिरे, परराष्ट्र मन्त्रालयका सचिव अमृतबहादुर राई, पूर्वाञ्चल विश्वविद्यालयका रजिस्ट्रार डा. बलबहादुर पराजुली, कीर्तिमानी पर्वतारोही मिङ्मा शेर्पा र आङदावा शेर्पा, पर्यटन बोर्डका सदस्य तेम्बा शेर्पा, संसद् सचिवालयका सचिव प्रकाश अधिकारी तथा पूर्व विशिष्ट श्रेणीका कर्मचारी एवं समाजसेवी लोकमान मास्के रहेका छन्।
कार्यक्रममा खाँदबारी सेवा समाजका अध्यक्ष दानबहादुर मास्केले संखुवासभामा जन्मिएका व्यक्तित्वहरूले विभिन्न क्षेत्रमा उच्च जिम्मेवारीमा रहेर राष्ट्र निर्माणमा महत्त्वपूर्ण योगदान पुर्याइरहेको बताए। उनले सम्मानित व्यक्तित्वहरूले आगामी दिनमा पनि समाज रूपान्तरण र देश विकासमा अझ सशक्त भूमिका निर्वाह गर्ने विश्वास व्यक्त गरे।
सम्मान ग्रहण गर्दै व्यक्तित्वहरूले समाजले गरेको सम्मानले आफूहरूलाई थप जिम्मेवार भएर काम गर्न प्रेरणा मिलेको बताए।
कार्यक्रममा निर्वाचन आयोगका पूर्वप्रमुख आयुक्त दिनेश थपलिया, पूर्वसचिवहरू दिनेश घिमिरे, शेरबहादुर ढुंगाना, बद्रीप्रसाद चापागाईं, युवराज चिमरिया, जीवनाथ पोखरेल, ललित शाक्य, सुरेश निरौला, दिनेश चिमरिया, दिपेन्द्र बान्तवा राईलगायतको उपस्थिति रहेको थियो।
सोही अवसरमा ‘कथा सौगात’ पुस्तकको समेत लोकार्पण गरिएको थियो।
प्रतिक्रिया