नेपाल आइपुगे फुटबल प्रशिक्षक हुमागाई, छिट्टै प्रशिक्षण सुरु गर्ने



काठमाडौं । बंगलादेशसँगको मैत्रीपूर्ण खेलका लागि नेपाली राष्ट्रिय फुटबल टिमका कार्यवाहक मुख्य प्रशिक्षक बनेका प्रदीप हुमागाई काठमाडौं आइपुगेका छन् । हाल अमेरिकामा बसोबास गर्ने उनी बुधबार बिहान स्वदेश फर्किएका हुन् ।

बुधबारै अखिल नेपाल फुटबल संघ (एन्फा) ले हुमागाईलाई सातदोबाटोस्थित एन्फा कम्प्लेक्समा स्वागत गरेको छ । नेपालले ११ असोजमा दशरथ रंगशालामा बंगलादेशसँग मैत्रीपूर्ण खेल खेल्दैछ । त्यसैका लागि २६ साउनमा बसेको एन्फा कार्यसमिति बैठकले हुमागाईंलाई कार्यवाहक प्रशिक्षक नियुक्त गरेको थियो ।

एन्फाले हुमागाईंको सहायक प्रशिक्षकमा युगल किशोर राई र गोलकिपर प्रशिक्षकमा विनोद डंगोललाई नियुक्त गरेको छ ।

नेपालका मुख्य प्रशिक्षक अब्दुल्लाह अल्मुताइरी हाल बिरामी बिदामा आफ्नै देश कुवेतमा छन् । खेलाडी-प्रशिक्षक विवादको विषयमा छानबिन समितिले तयार पारेको प्रतिवेदनको विषयमा अल्मुताइरीको जवाफ आउन बाँकी रहेकाले पनि एन्फाले बंगलादेशसँगको खेलका लागि नयाँ प्रशिक्षक नियुक्त गरेको हो ।

हुमागाईले मैत्रीपूर्ण खेलका लागि ४० खेलाडीलाई छनोट गरिसकेका छन् । हुमागाई आएपछि राष्ट्रिय टिमको प्रशिक्षण पनि छिट्टै सुरु हुने भएको छ । बिहीबार प्रशिक्षक हुमागाईले टिम मिटिङ गर्ने र त्यसपछि प्रशिक्षणको मिति तय हुने एन्फा महासचिव किरण राईले जानकारी दिए ।

पछिल्लो समय पुटबल गतिविधि नहुँदा कतिपय फुटबल खेलाडी विदेश पलायन भएका छन् भने केही खेलाडी भारतको स्थानीय प्रतियोगिता खेल्न गएका छन् । हुमागाईले बोलाएका केही खेलाडीहरु भारतबाट बुधबार नेपाल आइपुग्दैछन् ।

हुमागाईंले बन्द प्रशिक्षणका लागि बोलाएका ४० खेलाडी

गोलरक्षक ः किरण चेम्जोङ, विकेश कुथु, दीप कार्की, विशाल श्रेष्ठ

डिफेन्डर ः अनन्त तामाङ, रोहित चन्द, विकास तामाङ, देवेन्द्र तामाङ, दिनेश राजवंशी, विकास खवास, गौतम श्रेष्ठ, छिरिङ गुरुङ, सुमन अर्याल, निशान खड्का, अमित तामाङ

मिडफिल्डर ः सन्जोग राई, पुजन उपरकोटी, राजन गुरुङ, एरिक विष्ट, सेसेहाङ आङदाम्बे, सुदिप गुरुङ, सुरज ज्यु ठकुरी, सुवास गुरुङ, आवास लामीछाने, सुनिल बल, आयुष घलान्, सुजल श्रेष्ठ, अञ्जन विष्ट,

फरवार्ड ः विमल घर्ती मगर, नवयुग श्रेष्ठ, आशिष चौधरी, ऋतिक खड्का, जर्ज प्रिन्स कार्की, आषिश चापागाईं, अभिषेक रिजाल, भरत खवास ।

 

 

सम्बन्धित समाचार