धनकुटा । धनकुटा नगरपालिका–६ पात्लेखोला नजिक शुक्रबार करेन्ट लागेर एक जनाको मृत्यु भएको छ । घरमा ढोका बनाउँने क्रममा विद्युतको लाइन सर्ट भएर करेन्ट लाग्दा धनकुटा–६ पाङ्सिङ्ग बरबोटेका ५७ वर्षीय राजबहादुर राईको मृत्यु भएको हो ।

उनी घर निर्माण र काठको काम गर्ने मिस्त्री हुन् । स्थानीय उद्धव कटुवालको घरमा दिउँसो करिब १२ बजे बाथरुमको ढोका मर्मतको काम गर्ने क्रममा ड्रिल मेसिनबाट विद्युत सर्ट भएर उनलाई करेन्ट लागेको बताइएको छ ।

करेन्ट लागेर गम्भीर घाइते भएका राईलाई उपचारका लागि धनकुटा जिल्ला अस्पताल ल्याइएको थियो । अस्पतालमा उपचारका क्रममा केही समय पछिनै उनको मृत्यु भएको जिल्ला प्रहरी कार्यालयका डीएसपी चिरञ्जिवी दाहालले जानकारी दिए ।

मृतक राईका श्रीमती सहित दुई छोरा र दुई छोरी छन् । उनी लामो समययता मिस्त्री काम गर्दै आएका थिए ।