खाँदबारी । खाँदबारी नगरपालिका ९ मा पर्ने सभाखोलामा नुहाउन गएका बाबु छोरा बेपत्ता भएका छन् ।

बेपत्ता हुनेहरूमा खाँदबारी ७ का करीब ४० बर्षका तारानाथ काफ्ले र उनका छोरा १५ बर्षका सनम काफ्ले रहेको संखुवासभा जिल्ला प्रहरी प्रमुख डिएसपी वीरेन्द्र गोदारले जानकारी दिए ।

आफ्नै गाडी लिएर सोमबार सभाखोला गएका उनीहरू घर नफर्के पछि प्रहरीलाई आफन्तले मङ्गलबार बिहान खबर गरेका थिए । प्रदेश १-०२-००२ च ५९२० नम्बरको बलेरो जीप, कपडा, जुत्ता, मोवाईल फोन, साबुन लगायतका सामाग्री सभाखोला किनारमा भेटिएको प्रहरीले जनाएको छ ।

दुई जना मध्ये एक जना खोलामा डुबेपछि अर्कोले निकाल्न जाने क्रममा दुवै जनामा खोलामा डुबेका प्रारम्भिक अनुमान गरिएको डिएस्पी गोदारले जानकारी दिए ।

सोमबार पानी नपरेकोले खोला केहि सानो भए पनि मंगलबार रातीबाट नै पानी परेकोले खोलाको सतह बढेको डिएस्पी गोदारले बताए । बेपत्ता हुनेहरुको खोजी भईरहेको समेत डिएस्पी गोदारले जानकरी दिए ।