दिगो विकास लक्ष्य हासिल गर्न प्रत्येक वर्ष पाँच खर्ब ८५ अर्ब रुपैयाँ लगानी अपुग हुने राष्ट्रिय योजना आयोगले जनाएको छ ।

आयोगले शुक्रबार राजधानीमा नेपाल आर्थिक पत्रकार समाजसँगको छलफलमा दिगो विकास लक्ष्य कार्यान्वयनमा प्रत्येक वर्ष पाँच खर्ब ८५ अर्ब लगानी न्यून हुने जनाएको हो ।

आयोगले कृषि, स्वास्थ्य, शिक्षा, खानेपानी तथा सरसफाइ, ऊर्जा, सहरी विकास र जलवायु परिवर्तनको क्षेत्रगत आधार एवं गरिबी, लैंगिक विभेद, आर्थिक र समावेशी वृद्धि, उद्योग, आवास, सुशासन र सडकको प्रतिइकाइ लागत र अपेक्षित प्रतिफलको आधारमा उक्त रकम अपुग हुने देखिएको जनाएको हो ।

आयोगले सार्वजनिक क्षेत्रमा दुई खर्ब १८ अर्ब तथा निजी क्षेत्रमा तीन खर्ब ६६ अर्ब ८० करोड रुपैयाँ लगानी अभाव हुने जनाएको छ ।

सार्वजनिक क्षेत्रबाट प्रत्येक वर्ष ११ खर्ब ११ अर्ब र निजी क्षेत्रबाट ७ खर्ब ३९ अर्ब रुपैयाँ लगानी हुने प्रक्षेपण गरिएको छ ।

यस्तै, घरपरिवारबाट ८८ अर्ब २० करोड र सहकारी तथा गैरसरकारी क्षेत्रबाट ८६ अर्ब ५० करोड रुपैयाँ लगानी हुने आयोगको अनुमान छ ।

आयोगले दिगो विकास लक्ष्य हासिल गर्न स्रोत अभाव भएपनि त्यसको परिपूर्तिका लागि वैदेशिक लगानी र बाह्य स्रोत परिचालनमा जोड दिनुपर्ने जनाएको छ ।