राजविराज। सप्तरीमा ७० वर्षीया एक वृद्धालाई बलात्कार गरेको आरोपमा एकजना पक्राउ परेका छन् ।

सप्तरीको खडक नगरपालिका–८ मुसहर्नियाका ४० वर्षीय रोहित सदालाई शुक्रबार प्रहरीले पक्राउ गरेको छ । बलात्कार गरी फरार रहेका आरोपित गाउँ आएको सूचना पाएपछि प्रहरीले उनलाई घरबाटै पक्राउ गरेको इलाका प्रहरी कार्यालय कल्याणपुरका प्रहरी निरीक्षक विष्णुप्रदीप बस्यालले बताए ।

मादक पदार्थ खाएर लठ्ठिएका सदाले गत असोज १६ गते राति बलात्कार गरेर फरार भएको प्रहरीको आरोप छ । परिवारका सबैजना मेला हेर्न गएको मौका पारी घरमा एक्लै सुतिरहेकी वृद्धालाई आरोपितले बलात्कार गरेको पीडितले बताएकी छन् ।

भाइको घरमा बस्दैआएकी बृद्धा एकल महिलाले घटनालगत्तै असोज १७ गते दिएको उजुरी इलाका प्रहरी कार्यालय कल्याणपुरले सोही दिन दर्ता गरेको थियो । संवेदनशील घटना भएको भन्दै अनुसन्धानका लागि तत्कालिन एसपी राजेन्द्र विष्ट स्वयं घटनास्थल पुगेका थिए ।

उनले आरोपितको विर्यका दाग पीडितको कपडा र ओछ्यानमा फेला परेको बताएका थिए । आरोपितलाई सप्तरी जिल्ला अदालतबाट म्याद थप गरी इलाका प्रहरी कार्यालय, कल्याणपुरको हिरासतमा राखिएको छ ।