सर्लाही । प्रहरीले सर्लाहीको लालबन्दी नगरपालिका–५, मेजरगन्जबाट एकथान पेस्तोलसहित दुईजनालाई पक्राउ गरेको छ ।
पक्राउ पर्नेमा लालबन्दी नगरपालिका–५, मेजरगन्जका ३० वर्षीय राजेश महतो र सोही ठाउँका ४० वर्षीय सोनालाल ठाकुर रहेका छन् ।
उनीहरुलाई शनिबार बिहान २ बजेतिर इलाका प्रहरी कार्यालय लालबन्दीबाट प्रहरी निरीक्षक नारायण थापाको ‘कमान्ड’मा खटिएको प्रहरी टोलीले पक्राउ गरेको हो ।
दुईओटा फरक–फरक मोटरसाइकलमा जब्दीबाट लालबन्दीतर्फ आउँदै गरेका उनीहरुलाई प्रहरीले रोकेर चेकजाँच गर्न खोज्दा राजेश महतो बीआर०६एजे ०८०६ भारतीय नम्बरप्लेटको मोटरसाइकल छाडेर भाग्न सफल भएका थिए ।
त्यसक्रममा महतोले धानखेतमा फालेर भागेको वर्षादीभित्र कटुवा पेस्तोल फेलापरेको थियो ।
महतो फरार हुनासाथ व्यापकरुपमा खोजी गर्दा शनिबार बिहान ८ बजेतिर लालबन्दीस्थित बजार क्षेत्रमा हिँडिरहेको अवस्थामा पक्राउ गरिएको प्रहरीले जनाएको छ ।
सोनालाल ठाकुरलाई भने प्रहरीले चेकजाँचकैक्रममा मेजरगन्जबाट उनी सवार ना६प २३९२ नम्बरको मोटरसाइकलसहित पक्राउ गरेको थियो ।
पक्राउ परेका दुवैलाई इलाका प्रहरी कार्यालय लालबन्दीको हिरासतमा राखी थप अनुसन्धान भइरहेको सर्लाही प्रहरीका प्रवक्ता डीएसपी प्रतितसिंह राठोरले जानकारी दिए ।
सर्लाही प्रहरीले चार दिनअघिमात्रै ईश्वरपुर नगरपालिका–११, बेलागाउँबाट एकथान पेस्तोल, दुई राउन्ड गोली र दुईथान गोलीको खोकासहित दुईजनालाई पक्राउ गरेको थियो ।
प्रतिक्रिया