संखुवासभा । किराँत प्रदेशको नामाकरण गर्न माग गदै संखुवासभामा आन्दोलन भएको छ । शुक्रबार सदरमुकाम खाँदबारीमा आदिबासी किराँत महासंघ र किराँत प्रदेश स्वायत्त संघर्ष समिति संखुवासभाले प्रदेश नम्बर १ को नाम किराँत प्रदेश राखिनु पर्ने माग गदै आन्दोलन गरेको हो ।
सदरमुकाम खाँदबारीमा प्ले कार्ड सहित नारा जुलुशमा निस्किएका किराँत समुदायले प्रदेशको नामाकरण गर्दा किराँत प्रदेश नै राखिनुपर्ने भन्दै जिल्ला समन्वय समितिका प्रमुख सुमन शाक्यलाई ज्ञापनपत्र समेत बुझाए । उनीहरुले एक नम्बरमा किराँतीहरुको आदिमकाल देखि बसोबास रहेकाले किराँत प्रदेश नै नामाकरण हुनपर्ने स्थानीय अगुवा गणेश मेवाहाङले बताए । उनले ज्ञापनपत्र जिसस प्रमुख शाक्यलाई हस्तान्तरण गरेका थिए ।
ज्ञापनपत्र बुझदै जिसस प्रमुख शाक्यले सात वटा प्रदेश हाम्रो १ नम्बर प्रदेश बाहेक अन्य ६ वटा प्रदेशको नामाकरण हुँदा १ नम्बर प्रदेशको नामाकरण हुन नसक्नु दुःखत भएको बताउदै चाँडै नामाकरण होस भन्ने चाहेको बताए । उनले छिटो माध्यमबाट सो ज्ञापनपत्रलाई प्रदेश सरकार र प्रधानमन्त्री कार्यालयमा पठाउने बताए ।
हिन्दु सभ्यताको धार्मिक पुस्तकहरुमा समेत किरातेश्वर महादेव र पार्वतीले समेत किराँती रुप धारण गरेको, शक्तिशाली एकलाब्य समेत किराँती नै थिए । एक नम्बर प्रदेशमा किराँतीहरुको आदिमथलो भएको र सामाजिक, राजनैतिक, आर्थिक, धार्मिक, न्यायिक र साँस्कृतिक संरचनाको निर्माणकर्ता समेत किराँती नै भएकाले एक नम्बर प्रदेश नामाकरण गर्दा किराँत प्रदेश नै हुनपर्ने ज्ञापनपत्रमा उल्लेख गरेका छन् ।
उक्त आन्दोलनमा गाउँ–गाउँबाट किराँत समुदायका स्थानीय अगुवाहरु खाँदबारीमा भेला भएका थिए । अहिले पहिचानको मुद्धालाई लिएर किराँत समुदायले प्रदेश राजधानी विराटनगरमा समेत पटक–पटक आन्दोलन गदै आएको छ ।
प्रतिक्रिया