खाँदबारी । किरात मेवाहाङ याखोम्माको अध्यक्ष शंकरदास मेवाहाङ द्वारा लिखित आत्मवृतान्त ‘जीवनको चक्रमा म शंकरदास मेवाहाङ’ हालै बिमोचन भएको छ । संस्थाको दोस्रो राष्ट्रिय सम्मेलनको अवसरमा पाँच जना विशिष्ट व्यक्तिहरुद्वारा उक्त पुस्तक बिमोचन गरिएको हाे ।
संखुवासभाका प्रदेश सभा सदस्य राजेन्द्र कार्की, आदिवासी किरात महासंघका अध्यक्ष धिरेन बाहिङ, सिलिचोङ गाउँपालिका अध्यक्ष भुपालराज मेवाहाङ, साल्पासिलिछो गाउँपालिका भोजपुरका अध्यक्ष दौलथ कुलुङ र चिचिला गाउँपालिकाका उपाध्यक्ष मनकला मेवाहाङले संयुक्त रुपमा पुस्तक बिमोचन गरेका हुन् ।
कुनै औपचारिक शिक्षा नलिएका सामन्य साक्षर लेखकको यो तेस्रो पुस्तक हो । पुस्तकमा लेखकको सुरुवाती जीवनको संघर्षदेखि पञ्चायती व्यवस्थाको अन्तिम प्रधानपञ्च हुँदै संखुवासभादेखि धरान बसाइँसराइसम्मको अनुभव समेटिएका छन ।
संखुवासभा जिल्लाको बिकट गाउँ मांतेवामा जन्मिएका लेखकले राणाकाल अन्त्य तिरको निरंकुश शासनको पीडा र चरम गरिबीको कथा पुस्तकको पहिलो भागमा समेटिएको छ । पुस्तकको मध्य भागमा लाहुर जान असफल भएको घटना, विवाह र राजनीतिमा प्रबेशको प्रसंग उल्लेख छन ।
पुस्तकको अन्तिम भागमा परिवारका सदस्यहरुको वैदेशिक रोजगारी (लाहुर)को कारण आएको आर्थिक सुधार, समाजसेवामा प्रबेश र बसाइँसराइको कथा उल्लेख गरिएका छन । पुस्तकको बिचबिचमा लेखकले विभिन्न रमाइला दन्त्य कथा, जनजिब्रोका भाका, समसामयिक घटनाका विवरण पनि समेटेका छन ।
२४२ पृष्ठको उक्त पुस्तकको मुल्य रु ३५० तोकिएको छ । पुस्तकको डिजाइन आशिष मुखियाले गरेका छन भने उज्ज्वल पृन्टिङ प्रेसले प्रकाशित गरेको छ ।
मेवाहाङ सिलिचाेङ २ बालामा यहिँ फागुन २१ गते सम्पन्न राष्ट्रिय सम्मेलनबाट दाेश्राे पटक अध्यक्ष पदमा चुनिएका हुन् ।
प्रतिक्रिया