विराटनगर । मोरङको कानेपोखरी गाउँपालिका–७ प्रगति टोलस्थित भित्री सडक खण्डमा बुधबार बिहान जीवन विकास नामक लघुवित्तका कर्मचारीबाट मोटरसाइकल र नगद लुटिएको छ ।

रकम संकलनमा खटिएका संस्थाको रमाईलो शाखामा कार्यरत जुनियर सहायक मोरङको रतुवामाई नगरपालिका–३ का जयकिसन गनगाईंमाथि लुटपाट भएको इलाका प्रहरी कार्यालय पथरीका डीएसपी लक्ष्मीराज अधिकारीले बताए ।

एक ठाउँबाट अर्को ठाउँमा कलेक्सनका लागि जाने क्रममा कर्मचारी लुटिएको प्रहरीको भनाइ छ । लुटपाटमा संलग्नले को ३४ प ४९७ नम्बरको मोटरसाइकल र गनगाईंले उठाएको एक लाख १७ हजार तीन सय ६० रुपैयाँ नगद लगेको अधिकारीको भनाइ छ ।

उनकाअनुसार पैसा उठाउन जाने क्रममा जंगलको बाटोमा माक्स लगाएर बसेका दुई जना अपरिचित व्यक्तिहरुले घटना गराएको खुलेको छ । डीएसपी अधिकारीले लुटिएको खवर प्राप्त हुन साथ परिचालित प्रहरी टोलीले आधा घण्टापछि मोटरसाइकल भने घटनास्थलबाट दुई किलोमिटर उत्तरमा फेला पारेको जानकारी दिए ।