स्वास्थ्य परीक्षण गरिएका सबैमा पानीबाट हुने रोगको संक्रमण देखिएको नगर स्वास्थ्य शाखाका प्रमुख सुपेन्द्र कार्कीले बताए । सुघार गृहमा रहेका ५३ जना बालकहरुमा छाला चिलाउने, दाद, डाबर आउनेलगायतका समस्या देखिएको थियो । उनीहरुलाई निशुल्क औषधी पनि वितरण गरिएको छ ।

१८ वर्षमुनिको बालबालिका राख्ने सुधार गृहमा रहेका बालबालिकामा स्वास्थ्य समस्या देखिएपछि प्रमुख जिल्ला अधिकारी प्रेमराज जोशी, हेटौंडा उपमहानगरपालिकाका मेयर हरिबहादुर महतलगायत पदाधिकारी पनि सुधार गृहमा पुगेका थिए । बालबालिकाको स्वास्थ्य समस्या निदानका लागि पानीमा सुधार गर्नु आवश्यक रहेको प्रमुख जिल्ला अधिकारी जोशीले बताए ।

मेयर महतले तत्काल पानी परीक्षणसहित अन्य काम गर्न नगर स्वास्थ्य शाखालाई निर्देशन दिएका छन् । खानेपानी प्रशोधन गर्न युरोगाडको व्यवस्था र नुहाउने पानी प्रशोधनका लागि पनि आवश्यक प्रबन्ध मिलाउन शाखालाई भनेका थिए । सुधार गृहमा इनार खनेर निकालेको पानी तान्नका लागि प्रयोग गरेको मोटर बिग्रदा ट्यांकीमा जमेको पानीमा समस्या आएको अनुमान गरिएको छ ।