झापामा सोमबार राति दुईवटा मोटरसाइकल जुध्दा एक जनाको मृत्यु भएको छ ।

कचनकवल गाउँपालिका–६ मा पूर्वतर्फ आउँदै गरेको मे १० प ५२८९ नम्बरको मोटरसाइकल र विपरीत दिशातर्फ जाँदै गरेको मे ८ प २१३७ नम्बरको मोटरसाइकल एक आपसमा जुध्दा दुर्घटना भएको हो । प्रहरीका अनुसार दुर्घटनामा ५२८९ नम्बरको मोटरसाइकलका चालक ३७ वर्षीय सोम दाहालको मृत्यु भएको हो ।

दुर्घटनामा परेर गम्भीर घाइते भएका उनको उपचारका क्रममा राति ९ बजेतिर झापाको बि एन्ड सी अस्पतालमा मृत्यु भएको प्रहरीले जनाएको छ । दुर्घटनामा अर्को मोटरसाइकलमा सवार २६ वर्षीय करण राजवंशी र १८ वर्षीया जयामति राजवंशी गम्भीर घाइते भएका छन् ।

प्रहरीका अनुसार दुवै मोटरसाइकल तीव्र गतिमा थिए । तीव्र गतिकै कारण दुर्घटना भएको पाइएको प्रहरीले जनाएको छ । प्रहरीले दुर्घटनाका बारेमा अनुसन्धान थालेको छ ।