मोरङको रङ्गेली नगरपालिका–७ स्थित माउन्ट मकालु बोर्डिङ स्कुलको बसले ठक्कर दिँदा घाइते भएकी एक नाबालिकाको उपचारका क्रममा शुक्रबार बिहान मृत्यु भएको छ ।

बोर्डिङको एलकेजीमा अध्ययनरत रङ्गेली–६ की ६ वर्षीया सुनमकुमारी मण्डलको विराटनगरस्थित न्युरो अस्पतालमा मृत्यु भएको हो । को १ क ११३० नम्बरको बसले गत मङ्गबार दिउँसो ठक्कर दिँदा उनी गम्भीर घाइते भएकी थिइन् । रङ्गेलीमा सम्भव नभएपछि उनलाई थप उपचारका लागि विराटनगर ल्याइको थियो ।

बसको ठक्करबाट नर्सरीमा अध्ययनरत रङ्गेली–७ का ४ वर्षीय रीतिक मण्डलको मङ्गलबार नै मृत्यु भएको थियो । स्कुल छुट्टि भएपछि पैदल नै घरतिर जाँदै गरेका सुनमकुमारी र रीतिकलाई स्कुलको गेटछेउमै बसले ठक्कर दिएको थियो । विद्यार्थी बोकेर स्कुलबाट निस्किएको बसले ब्याक गर्ने क्रममा उनीहरुलाई ठक्कर दिएको प्रहरीले जनाएको छ ।

दुर्घटनाको विरोधमा उत्रिएका स्थानीयले टायर बाल्दै प्रदर्शन गरेर स्कुल र स्कुलकै अर्को बसमा तोडफोडसमेत गरेका थिए ।