सायद यो दुनियाँकै सबैभन्दा महँगो बियर बन्यो होला । नबनोस् पनि किन एक बोतलकै ५५ हजार पाउण्ड अर्थात् ८० लाख रुपैयाँभन्दा बढी मूल्य जो परेको छ ।
हो, बेलायतको म्यानचेस्टरमा हालै एउटा अनौठो घटना भएको छ । त्यहाँको एउटा होटलले एकजना खेल पत्रकारलाई एक बोतल बियर पिएबापत झण्डै ८० लाख रुपैयाँ बराबरको बिल थमाएको छ ।
अस्ट्रेलियाका खेल पत्रकार पिटर लालोरले एउटा बियर पिएबापत ५५ हजार पाउण्ड रकम तिर्नु परेपछि आफुले विश्व इतिहासमै सबैभन्दा महँगो बियर आफूले पिएँ भन्ने उनलाई लागेको छ ।
एसेस टेष्ट क्रिकेट श्रृंखलाको समाचार संकलनका लागि बेलायत पुगेका थिए पिटर लालोर । म्यानचेष्टरस्थित मालमेसन होटलमा उनी बसेका थिए । उक्त होटलमा उनले आफ्ना साथीहरुसँगै एउटा बियर अर्डर गरे । उक्त बियरको अंकित मूल्य साडे ५ पाउण्ड थियो ।
तर अन्तिममा बिल तिर्दाचाहिँ उनले ५५ हजार पाउण्ड रकम गरे । उनले कार्डमार्फत मेसिनमा रकम भुक्तानी गरे । मेसिन बिग्रेकाले तत्कालै बिल ननिस्किएपछि उनले अहिले बिल चाहिएन भनेर वेटरलाई पठाए । तर जाँदाजाँदै उनले ‘मैले कति रकम तिरे ?’ भनेर सोधेछन् । जब वेटरले मेसिनबाट बिल निकालेर हेरिन् तब उनी अत्तालिँदै हातले मुख थुनिन् । रकम बारे केही बोलिनन् । गल्ती भएको छ, छिटै सच्याउछौँ मात्र भनिन् ।
उनको खाताबाट थुप्रो रकम कट्टी भएको थाहा भए पनि ठ्याक्कै कति रकम काटियो भन्नेचाहिँ मेसिन बिग्रिएका कारण पत्तो लगाउन सकिएको थिएन । तर लालोरका परिवारले घरबाटै बैंक खाता चेक गर्दा मात्रै उनको खाताबाट ५५ हजार ३ सय पाउण्ड कट्टी भएको थाहा भयो । त्यसमा थप १३ सय ८० पाउण्ड भुक्तानी शुल्क ।
यस्तो गम्भीर त्रुटी भएसँगै पिटर तत्कालै बिल लिएर होटल व्यवस्थापक कहाँ पुगे । उनलाई बढी भुक्तान भएको रकम छिटै नै बैंक खातामा फिर्ता दिने आश्वासन दिइयो । होटलले आफूसँग माफी मागेको र सहयोगी व्यवहार देखाएको उनले ट्वीटरमार्फत जानकारी दिएका छन् ।
स्मरण रहोस् यसअघि बलिउड अभिनेता राहुल बोसलाई एउटा होटलमा दुईवटा केराको ४१३ भारु मूल्य असूलेको समाचारले निकै चर्चा कमाएको थियो । पछि उक्त होटललाई कारवाही समेत भएको थियो ।
प्रतिक्रिया