भोजपुरमा सात प्रतिशत हात्तीपाइले सङ्क्रमित



१२ फागुन, भोजपुर। भोजपुरमा कुल जनसङ्ख्याको सात प्रतिशत हात्तीपाइले रोगको सङ्क्रमित रहेको जिल्ला जनस्वास्थ्य कार्यालय भोजपुरले जानकारी दिएको छ ।

हात्तीपाइले रोग निवारणसम्बन्धी बुधबार भोजपुर जिल्लामा क्रियाशील पत्रकारसँगको अन्तरक्रियामा यस्तो जानकारी गराइएकोे हो । विगत ६ वर्षयता देशव्यापीरुपमा थालिएको हात्तीपाइले रोग निवारणसम्बन्धी अभियानको छैटौं चरणमा आइपुग्दासम्म भोजपुरमा अपेक्षितरुपमा नियन्त्रणमा आइनसकेकाले पुनः यस वर्ष निरन्तरता दिइने जनाएको हो ।

अभियान थालिएको पहिलो वर्षमा टक्सार र जरायोटार गाविसको नमुना सङ्कलनबाट कुल जनसङ्ख्याको ४० प्रतिशत जनसङ्ख्यामा हात्तीपाइले सङ्क्रमण देखापरेको जिल्ला स्वास्थ्य कार्यालयका प्रमुख कृष्ण मिजारले बताए।

नियन्त्रणका लागि यही फागुन २१, २२ र २३ गतेसम्म पाँचसय ६७ केन्द्रमा औषधि वितरण गर्ने स्वास्थ्य कार्यालयले जानकारी दिएको छ ।

यसका लागि जिल्लाभरबाट चारसय ३५ स्वास्थ्यकर्मी, एकहजार एकसय तीन महिला स्वास्थ्य स्वयम्सेविका खटिनेछन् ।

सम्बन्धित समाचार