असार पहिलो साताको बाढीपहिरोको चपेटामा परेको हिमालपारिको जिल्ला मनाङका बाढीपीडितलाई गण्डकी प्रदेश सरकारले विशेष राहत दिने भएको छ । प्रदेश सरकारले बाढीले पूर्ण रुपमा क्षति पुगेको घर निर्माणका लागि प्रतिघर २ लाख रुपैयाँ प्रदान गर्ने घोषणा गरेको छ ।

बाढीले पुर्‍याएको क्षतिको मूल्यांकन गरी उक्त राहत प्रदान गर्न लागिएको प्रदेशका मुख्यमन्त्री कृष्णचन्द्र नेपाली पोखरेलले बताए । प्रदेशका मुख्यमन्त्री पोखरेल र अर्थमन्त्री रामजीप्रसाद बरालले सोमबार मनाङको नासों गाउँपालिकाका दुईठाउँमा पुगेर क्षतिग्रस्त स्थलको अवलोकन गरेका छन् । स्थानीय बाढीपीडितसँगको अन्तरक्रियाका क्रममा मुख्यमन्त्री पोखरेलले बाढीले पूर्ण क्षति पुर्‍याएका घर निर्माणका लागि प्रतिघर २ लाख रुपैयाँ प्रदान गर्ने घोषणा गरे ।

मनाङमा यो बर्खामा ८५ घर पूर्ण रुपमा क्षति भएको प्रदेश सरकारले बताएको छ । नासों गाउँपालिका–१ मा मात्र ७० घरमा क्षति पुगेको छ । त्यस्तै धारापानीमा पनि १२ घरमा क्षति पुगेको गाउँपालिका अध्यक्ष चन्द्र घलेले बताए । मुख्यमन्त्री पोखरेलले लम्जुङको बेसीसहरदेखि मनाङको चामेसम्मको सडक खुलाउन संघ सरकारले काम थालिसकेको र तालसम्म गाडी चल्न थालिसकेको बताए । त्योभन्दा माथि पनि अहिले धमाधम काम भइरहेको छ ।

मुख्यमन्त्री पोखरेलले बाढीपहिरो प्रभावित क्षेत्रको आवश्यकताका आधारमा प्राथमिकता तोकेर संघ सरकारसँग समन्वय गर्दै काम गर्ने प्रतिबद्धता जनाए । संघीय सरकारले यसअघि नै मनाङलाई विपद संकटग्रस्त घोषणा गरिसकेको छ । जिल्लामा विभिन्न बस्तीको पुनर्निर्माणका लागि आफूले केन्द्रसँग समन्वय गरिरहेको पोखरेलको भनाई छ ।